मुंबईकरांनो गरज असेल तरच बाहेर पडा, रेड अलर्ट जारी, मुसळधार पावसाने लोकल मंदावली, रस्तेही जलमय
Mumbai Weather Update : मुंबई शहर-उपनगरासह परिसरातील ठाणे, कल्याण डोंबिवली, अंबनाथ, बदलापूर, वाशी, पनवेल, वसई विरार, पालघर या भागातही पावसाचा जोर आहे
मुंबई : मुंबईसह ठाणे, कल्याण डोंबिवली, वसई विरार परिसरात ऐन दहीहंडीच्या दिवशी पावसाने चांगलाच जोर धरला आहे. भारतीय हवामान विभागाने मुंबई महानगराला आज, शनिवार 16 ऑगस्ट 2025 रोजी अतिमुसळधार पावसाचा इशारा म्हणजेच रेड अलर्ट दिला आहे.
शुक्रवारी रात्री राज्यभरात कृष्ण जन्माष्टमीचा उत्सव सुरु असतानाच पाऊस सुरु झाला. मुंबई शहर-उपनगरासह परिसरातील ठाणे, कल्याण डोंबिवली, अंबनाथ, बदलापूर, वाशी, पनवेल, वसई विरार, पालघर या भागातही पावसाचा जोर पाहायला मिळत आहे. यामुळे मुंबईची जीवनवाहिनी असलेली लोकल ट्रेन मंदावली आहे. तर रस्ते वाहतुकीवरही परिणाम झाला आहे. अनेक सखल भागांमध्ये पाणी साचून रस्ते जलमय झाले आहेत.
गरज असेल तरच घराबाहेर पडा
आवश्यकता नसल्यास शक्यतो घराबाहेर पडणे टाळा, कुठलीही आवश्यकता भासली, तर मदत आणि अधिकृत माहितीसाठी बृहन्मुंबई महानगरपालिकेच्या मुख्य नियंत्रण कक्षाच्या 1916 या संपर्क क्रमांकावर संपर्क साधा, महानगरपालिका प्रशासनाला सहकार्य करावे, असे आवाहन प्रशासनाने केले आहे.
मुख्य संपादक: संदीप जाधव
