अखेर दिवा शहराला मिळाला स्वतंत्र पिनकोड विजय भोईर यांच्या पाठपुराव्याला मोठे यश
ठाणे, ता. २१ मे : दिवा शहराच्या स्वतंत्र ओळखीच्या दृष्टीने अत्यंत महत्त्वाची घडामोड घडली असून अखेर दिवा शहराला स्वतंत्र पिनकोड मिळाला आहे. भारतीय जनता पार्टीचे पदाधिकारी विजय अनंत भोईर यांनी यासाठी केलेल्या सातत्यपूर्ण पाठपुराव्याला अखेर यश आले आहे.
यापूर्वी मुंब्रा आणि दिवा या दोन्ही शहरांसाठी एकच पिनकोड वापरला जात होता. त्यामुळे नागरिकांना शासकीय कागदपत्रे, बँक व्यवहार, ऑनलाइन सेवा, कुरिअर वितरण तसेच विविध तांत्रिक प्रक्रियांमध्ये अनेक अडचणींना सामोरे जावे लागत होते. दिवा शहराला स्वतंत्र ओळख मिळावी आणि स्वतंत्र पिनकोड जाहीर करण्यात यावा, अशी मागणी विजय भोईर यांनी अनेक वर्षांपासून सातत्याने लावून धरली होती.
अखेर केंद्र शासनाने या मागणीची दखल घेत दिवा शहरासाठी स्वतंत्र 400611 हा नवीन पिनकोड मंजूर केला आहे. तर मुंब्रा शहरासाठी 400612 हा विद्यमान पिनकोड कायम राहणार आहे.
“आता तरी जागा हो दिवेकर” या अभियानाच्या माध्यमातून विजय भोईर यांनी केंद्र सरकारकडे वारंवार निवेदने, पत्रव्यवहार आणि पाठपुरावा केला होता. त्यांच्या या प्रयत्नांमुळे दिवा शहराला स्वतंत्र प्रशासकीय ओळख मिळाल्याची भावना स्थानिक नागरिकांमधून व्यक्त होत आहे.
नागरिकांच्या मते, स्वतंत्र पिनकोडमुळे भविष्यात पत्ता व्यवस्थापन अधिक सुलभ होणार असून शासकीय तसेच डिजिटल सेवांमध्ये होणारा गोंधळ कमी होण्यास मदत होणार आहे.
मुख्य संपादक: संदीप जाधव
