ठाणे पोलिसांच्या शिरपेचात मानाचा तुरा; भोसले दाम्पत्यास राष्ट्रपती पदक जाहीर
ठाणे मध्यवर्ती कारागृहातील पोलिस दाम्पत्यास राष्ट्रपती पदक जाहीर करण्यात आले आहे. यासह राज्यातील आणखी ६ अधिकाऱ्यांना सन्मानित केलं जाणार आहे.
ठाणे: गुणवत्तापूर्ण सेवेकरिता राज्याच्या कारागृह विभागातील अधिकारी आणि कर्मचारी अशा एकूण आठ जणांना राष्ट्रपती पदक जाहीर झाले आहे. यामध्ये ठाणे मध्यवर्ती कारागृहाच्या अधीक्षक राणी भोसले आणि त्यांचे पती अतिरिक्त अधीक्षक राजाराम भोसले यांचा समावेश आहे.
ठाणे मध्यवर्ती कारागृहाच्या अधीक्षकपदाची २३ जून २०२३पासून यशस्वीपणे जबाबदारी सांभाळणाऱ्या राणी भोसले यांनी यापूर्वी छत्रपती संभाजीनगर कारागृह, नागपूर आणि येरवडा मध्यवर्ती कारागृहात अधीक्षक म्हणून काम केले आहे. सांस्कृतिक कार्यक्रमाच्या माध्यमातून ठाणे मध्यवर्ती कारागृहातील कैद्यांमध्ये सकारात्मक बदल घडवणे, कैद्यांसाठी योग अभ्यासक्रम, ई-ग्रंथालय आणि इतरही विविध उपक्रम राबवणाऱ्या राणी भोसले यांच्यासह त्यांचे पती राजाराम भोसले यांना राष्ट्रपतींचे गुणवत्तापूर्ण सेवेसाठीचे पदक जाहीर झाले आहे.
ठाणे मध्यवर्ती कारागृहाचे अतिरिक्त अधीक्षक असलेले राजाराम भोसले यांनी कल्याण कारागृह येथे अधीक्षक म्हणून काम पाहिले आहे. गेल्या वर्षी त्यांना कारागृहाचे सन्मानचिन्ह मिळाले होते. भोसले दाम्पत्यासह गजानन सरोदे (उपअधीक्षक, मुंबई मध्यवर्ती कारागृह), संजय शिवगण (सुभेदार, मुंबई मध्यवर्ती कारागृह), सुधाकर चव्हाण (हवालदार, मुंबई मध्यवर्ती कारागृह), राजेश सावंत (हवालदार, भायखळा जिल्हा कारागृह), संजय जाधव (हवालदार, भायखळा जिल्हा कारागृह), विद्या ढेंबरे (शिपाई, कोल्हापूर मध्यवर्ती कारागृह) यांनाही राष्ट्रपतींचे गुणवत्तापूर्ण सेवेबाबत पदक जाहीर झाले आहे.
या सर्वांचे कारागृह विभागाच्या वतीने अपर पोलिस महासंचालक (कारागृह व सुधारसेवा) सुहास वारके आणि विशेष कारागृह महानिरीक्षक योगेश देसाई यांनी अभिनंदन केले.
केंद्रीय गृह मंत्रालयाच्या वतीने गुरुवारी देशातील उत्कृष्ट कामगिरी बजावणाऱ्या पोलिसांना राष्ट्रपती पदके जाहीर करण्यात आली. देशभरातील ६३५ पोलिसांना राष्ट्रपती पदके देण्यात येणार असून यामध्ये महाराष्ट्रातील ४९ पोलिसांचा समावेश आहे. यामध्ये सात पोलिस अधिकारी आणि कर्मचारी यांना शौर्य पदके, तीन पोलिसांना उल्लेखनीय सेवेबद्दल पदके, तर ३९ पोलिसांना गुणवत्तापूर्ण कामगिरीबद्दल पदके जाहीर करण्यात आली आहे. अनिल कुंभारे, नवीनचंद्र रेड्डी, राजेंद्रसिंग गौर यांना उल्लेखनीय सेवेबद्दल गौरविण्यात येणार आहे.
मुख्य संपादक: संदीप जाधव
