ठाण्यात एक संतापजनक प्रकार समोर आला आहे. वरिष्ठ पोलिस निरीक्षकांच्या रायटर कक्षात 25 हजारांची लाच घेताना लाचखोर सहायक पोलिस उपनिरीक्षकाला पोलिसांनी बेड्या ठोकल्या आहेत. या घटनेनं परिसरात खळबळ उडाली आहे.
मुंब्रा ठाणे : बोगस डॉक्टरवरील दाखल गुन्ह्यात कारवाई न करण्यासाठी 25 हजारांची लाच घेणाऱ्या सहायक पोलिस उपनिरीक्षकाला लाचलुचपत प्रतिबंधक विभागाने रंगेहाथ अटक केली. मुंब्रा पोलिस ठाण्यात कार्यरत असलेल्या या पोलिस कर्मचाऱ्याला पोलिस ठाण्याच्या वरिष्ठ पोलिस निरिक्षकांच्या रायटर कक्षात लाच घेताना अटक करण्यात आली.
मुंब्रा पोलिस ठाण्यात सहायक पोलिस उपनिरीक्षक असलेले शशिकांत भालेराव (वय 49) याने तक्रारदार बोगस डॉक्टरवर कारवाई न करण्यासाठी 50 हजारांची लाच मागितली होती. तडजोडीअंती 25 हजार रुपये घेण्याचे भालेराव याने कबूल केले. या प्रकरणी तक्रारदाराने ठाणे लाचलुचपत प्रतिबंधक विभागात तक्रार दाखल केली होती. त्यानुसार लाचलुचपत प्रतिबंधक विभागाने सापळा रचला. मुंब्रा पोलिस ठाण्याच्या वरिष्ठ पोलिस निरीक्षकांचे रायटर म्हणून भालेराव याच्याकडे जबाबदारी होती. त्यानुसार भालेराव याला वरिष्ठ पोलिस निरीक्षकांच्या रायटर कक्षात तक्रारदाराकडून 25 हजार रुपयांची लाच घेताना अटक केली. त्याचा मोबाईलही जप्त करण्यात आला असून या प्रकरणात इतर कोणाचा सहभाग आहे का, या अनुषंगाने तपास सुरू असल्याची माहिती ठाणे लाचलुचपत प्रतिबंधक विभागाच्या अधिकाऱ्यांनी दिली.
मुख्य संपादक: संदीप जाधव
