Manoj Jarange Patil: धक्कादायक! मनोज जरांगे पाटलांच्या ताफ्यातील वाहनांवर दगडफेक; स्कॉर्पियो-पिकअपच्या काचा फुटल्या, एक जखमी
Maratha Reservation News: मराठा आरक्षणाच्या मागणीसाठी मनोज जरांगे पाटील यांच्या नेतृत्वात आंदोलक मुंबईकडे निघाले आहेत. मात्र अहिल्यानगर जिल्ह्यात धक्कादायक घटना घडली असून जरांगे पाटील यांच्या ताफ्यातील वाहनांवर काही समाजकंटकांनी दगडफेक केली, ज्यात काही गाड्यांचे नुकसान झालं आहे. पोलिसांनी याप्रकरणी एका संशयिताला ताब्यात घेतलं आहे.
अहिल्यानगर: मराठा समाजाला इतर मागास वर्गातून (ओबीसी) आरक्षण मिळवण्याच्या मागणीसाठी मराठा आरक्षण आंदोलक मनोज जरांगे पाटील यांच्यासह हजारो आंदोलक बुधवारी अंतरवाली सराटी येथून शहागड-पैठणमार्गे मुंबईच्या दिशेने निघाले. छत्रपती शिवाजी महाराजांच्या अश्वारूढ पुतळ्याची आणि गणपतीची पूजा-आरती केल्यानंतर जरांगे यांना महिलांनी ओवाळले. आरक्षणासाठी ही आरपारची लढाई सुरू झाली आहे. आता कोणत्याही प्रकारची माघार घेणार नाही, असे जरांगे यांनी स्पष्ट केले आणि ते मुंबईच्या दिशेने निघाले. मात्र वाटेत अहिल्यानगर जिल्ह्याच्या हद्दीत धक्कादायक प्रकार घडला असून काही समाजकंटकांनी जरांगे पाटील यांच्या ताफ्यातील वाहनांवर दगडफेक केल्याची माहिती समोर आली आहे.
मनोज जरांगे पाटील यांचा ताफा अहिल्यानगर-कल्याण मार्गावर पोहोचल्यानंतर काही गाड्यांवर समाजकंटकांनी दगडफेक केली. या दगडफेकीत एक पिकअप आणि एका स्कॉर्पिओ गाडीच्या काचा फुटल्या. तसंच यामध्ये एक आंदोलक जखमी झाल्याचं सांगितलं जात असून सदर जखमीवर प्राथमिक उपचार करण्यात आले. या सर्व प्रकारानंतर दगडफेक करणाऱ्या विकृत समाजकंटकाला पोलिसांनी ताब्यात घेतले असल्याची माहिती मराठा आरक्षण आंदोलनाच्या समन्वयकांनी दिली आहे.
किल्ले शिवनेरीच्या पायथ्याशी होणार जाहीर सभा
मराठा आरक्षणाच्या मागणीसाठी मनोज जरांगे पाटील यांनी पुन्हा एकदा आंदोलनाचं रणशिंग फुंकलं असून ते मुंबईच्या दिशेने निघाले आहेत. जरांगे पाटील आज शिवनेरी किल्ल्यावरील शिवजन्मस्थळाला भेट देऊन मुंबईच्या आझाद मैदानाकडे निघतील. किल्ले शिवनेरीच्या पायथ्याशी छत्रपती शिवाजी महाराज चौकात त्यांची जाहीर सभा होणार आहे. मराठा मोर्चाचे समन्वयक संदेश बारवे यांनी ही माहिती दिली. मनोज जरांगे आपल्या समर्थकांसह बुधवारी सकाळी 10 वाजता अंतरवाली सराटीतून निघाले. ते आळेफाटा, ओतूरमार्गे जुन्नर येथे मुक्कामी आले. जरांगे पाटील यांच्या स्वागतासाठी जुन्नरमध्ये मोठी तयारी करण्यात आली होती.
मुख्य संपादक: संदीप जाधव
