रत्नागिरी मध्ये गांजा सदृश अंमली पदार्थासह एकास अटक; ५६२.५ ग्रॅम मुद्देमाल जप्त.
रत्नागिरी शहरानजीकच्या भाट्ये येथे
२८ हजार १२५ रुपयांच्या गांजा सदृश अंमली पदार्थासह एका व्यक्तीस शहर पोलिसांच्या गुन्हे प्रकटीकरण पथकाने अटक केली. या कारवाईत ५६२.५ ग्रॅम वजनाचा अंमली पदार्थ जप्त करण्यात आला आहे.
पोलिसांनी दिलेल्या माहितीनुसार, ही कारवाई सोमवार, १६ फेब्रुवारी रोजी दुपारी सुमारे २ वाजता भाट्ये येथील नेव्हल ऑफिस परिसरात करण्यात आली. इस्माईल सत्तार दर्वे (वय ४८, रा. मुरकरवाडी, भाट्ये) असे अटक करण्यात आलेल्या संशयिताचे नाव आहे.
शहर पोलीस ठाण्याचे उपनिरीक्षक सागर शिंदे व त्यांचे पथक गस्त घालत असताना इस्माईल दर्वे हा संशयास्पद हालचाली करताना आढळून आला. त्याची अंगझडती घेतली असता त्याच्याकडून ३९ पारदर्शक प्लास्टिक पिशव्यांमध्ये भरलेला ५६२.५ ग्रॅम वजनाचा गांजा सदृश अंमली पदार्थ जप्त करण्यात आला.
या प्रकरणी संशयिताविरुद्ध एनडीपीएस कायद्यानुसार कलम ८ (क), २० (ब), (अ) अंतर्गत गुन्हा दाखल करण्यात आला आहे. ही कारवाई पोलीस अधीक्षक नितीन बगाटे आणि उपविभागीय पोलीस अधिकारी निलेश माईनकर यांच्या मार्गदर्शनाखाली करण्यात आली असून, पुढील तपास सुरू आहे.
मुख्य संपादक: संदीप जाधव
