विशेष बातमी | महाराष्ट्र नामा
दिवा शहरात १ मेच्या पार्श्वभूमीवर बेकायदेशीर मद्यविक्रीचा धोका; कारवाईची मागणी तीव्र.
दिवा (ठाणे) : उद्या १ मे २०२६ रोजी राज्यभर महाराष्ट्र दिन, आंतरराष्ट्रीय कामगार दिन आणि बौद्ध पौर्णिमा हे तीन महत्त्वाचे दिवस एकाच दिवशी साजरे होत आहेत. या पार्श्वभूमीवर शासन नियमांनुसार मद्यविक्री बंद राहणे अपेक्षित आहे. मात्र, दिवा शहरात काही ठिकाणी बेकायदेशीरपणे मद्यविक्री सुरू असल्याचे समोर येत असून स्थानिकांमध्ये तीव्र नाराजी व्यक्त होत आहे.
मिळालेल्या माहितीनुसार, दिवा परिसरातील विविध बिल्डिंग, चाळी आणि गुप्त ठिकाणी काही व्यक्तींकडून अनधिकृत मद्यविक्री केली जात आहे. विशेष म्हणजे, या ठिकाणांची आणि संबंधित व्यक्तींची माहिती स्थानिकांकडे उपलब्ध असूनही संबंधित यंत्रणेकडून दुर्लक्ष होत असल्याचा आरोप करण्यात येत आहे.
स्थानिक सामाजिक कार्यकर्त्यांनी स्पष्ट इशारा दिला आहे की, उद्या बंदीच्या दिवशी जर मद्यविक्री आढळली तर संबंधित विक्रेते, पुरवठादार तसेच त्यांना सहकार्य करणाऱ्या अधिकाऱ्यांविरोधात पुराव्यासह तक्रारी दाखल करण्यात येतील. तसेच, सोशल मीडियावर लाईव्ह माध्यमातून या प्रकारांचा पर्दाफाश करण्याची तयारीही दर्शविण्यात आली आहे.
दिवा शहरातील छत्रपती शिवाजी महाराज परिसर आणि इतर संवेदनशील भागांमध्ये तातडीने छापेमारी करून बेकायदेशीर मद्यविक्री रोखावी, अशी मागणी जोर धरत आहे. काही व्यक्तींकडून लहान-मोठे आमिष दाखवून इतरांकडून मद्यविक्री करवून घेतली जात असल्याचाही आरोप पुढे आला आहे.
- पोलीस प्रशासनाला या सर्व बाबींची माहिती असूनही ठोस कारवाई होत नसल्याने नागरिकांमध्ये असंतोष वाढत आहे. कायद्याची अंमलबजावणी काटेकोरपणे व्हावी आणि उद्याचा दिवस शांततेत व नियमांचे पालन करून पार पडावा, अशी सर्वसामान्यांची अपेक्षा आहे.
— संपादक : संदीप जाधव
महाराष्ट्र नामा
मुख्य संपादक: संदीप जाधव
