दापोलीत ग्राम महसूल अधिकाऱ्याला लाच घेताना रंगेहात अटक;
लाचलुचपत प्रतिबंधक विभागाची कारवाई
दापोली, ता. २५ : सातबारा उताऱ्यावर खरेदीखताची नोंद करून फेरफार करण्यासाठी दहा हजार रुपयांची लाच स्वीकारताना दापोली तालुक्यातील नानटे सजा येथील ग्राम महसूल अधिकारी (तलाठी) श्रद्धा बालाजी बंडे (वय ३०) यांना लाचलुचपत प्रतिबंधक विभाग, रत्नागिरी युनिटने रंगेहात पकडले. ही कारवाई आज सायंकाळी दापोली तहसील कार्यालयातील सभागृहात करण्यात आली असून तालुक्यात खळबळ उडाली आहे.
लाचलुचपत प्रतिबंधक विभागाने दिलेल्या माहितीनुसार, तक्रारदार व त्यांच्या मित्रांनी मौजे तेरे वायंगणी येथील जमीन खरेदी केली होती. संबंधित खरेदीखताची सातबाऱ्यावर नोंद करून फेरफार मंजूर करण्यासाठी ग्राम महसूल अधिकारी श्रद्धा बंडे यांनी तक्रारदाराकडे १० हजार रुपयांची मागणी केली होती. याबाबत तक्रार प्राप्त झाल्यानंतर विभागाने पडताळणी करून सापळा कारवाईचे नियोजन केले. ठरल्याप्रमाणे तक्रारदाराने रक्कम दिल्यानंतर पथकाने तत्काळ छापा टाकत बंडे यांना ताब्यात घेतले.
संशयित श्रद्धा बंडे या मागील वर्षी सेवेत दाखल झाल्या होत्या. तहसील कार्यालयातच लाच स्वीकारताना त्यांना पकडण्यात आल्याने महसूल विभागात मोठी चर्चा सुरू झाली आहे. या प्रकरणी गुन्हा नोंद करण्याची प्रक्रिया सुरू असून पुढील तपास सुरू आहे.
सदर कारवाई पोलीस अधीक्षक शिवराज पाटील, अपर पोलीस अधीक्षक अमरसिंह जाधव यांच्या मार्गदर्शनाखाली पोलीस उपअधीक्षक अविनाश पाटील, पोलीस निरीक्षक मच्छिंद्र जाधव, पोलीस निरीक्षक सुहास रेंडे तसेच पथकातील कर्मचाऱ्यांनी केली.
मुख्य संपादक: संदीप जाधव
