Ajit Pawar on IPS Anjali Krishna : उपमुख्यमंत्री अजित पवार यांनी अखेर महिला आयपीएस अधिकाऱ्याला दमदाटी प्रकरणार भूमिका मांडली आहे. अजित पवार यांनी याबाबत व्हायरल झालेल्या भूमिकेवर स्पष्टीकरण दिलं आहे.

मुंबई : सोलापूरच्या माढा तालुक्यातील करमाळाच्या पोलीस उपअधीक्षक अंजली कृष्णा यांना उपमु्ख्यमंत्री अजित पवार यांनी फोनवरुन दमदाटी केल्याचा आरोप करण्यात येत आहे. या प्रकरणावरुन विरोधकांवनी अजित पवार यांच्यावर जोरदार निशाणा साधला. अजित पवार यांचा महिला पोलीस अधिकाऱ्याला दमदाटी करतानाचा व्हिडीओ देखील व्हायरल झाला आहे. अवैध मुरुम उत्खनन करणाऱ्यांविरोधात कारवाई करायला गेलेल्या महिला IPS अधिकाऱ्याला अजित पवार यांनी दमदाटी केली होती. संबंधित परिसरातील काही जणांनी कारवाई करायला गेलेल्या तहसीलदार, तलाटी यांना दमदाटी केल्याचादेखील आरोप करण्यात आला होता. तसेच पोलीस उपअधीक्षक अंजली कृष्णा या आपल्या टीमसह कारवाई करायला गेल्या असता राष्ट्रवादी काँग्रेसच्या एका कार्यकर्त्याने थेट अजित पवार यांना फोन केला होता.

अजित पवार यांनी आपण उपमुख्यमंत्री अजित पवार असून कारवाई तातडीने थांबवा, असे आदेश दिले होते. पण महिला पोलीस अधिकारी ऐकून घेण्याच्या मनस्थितीत नव्हत्या. त्यांनी अजित पवार यांना संबंधित आदेश आपल्या वैयक्तिक फोन नंबरवर फोन करुन कारवाई थांबवण्याचे आदेश द्यावेत, अशी विनंती केली. यानंतर अजित पवार यांनी अंजली कृष्णा यांचा फोन नंबर घेत त्यांना व्हिडीओ कॉल केला होता. यावेळी अजित पवार यांनी तुझी एवढी हिंमत, तुझ्यावर कारवाई करणार, असा इशारा आयपीएस अंजली कृष्णा यांनी दिला होता. या सर्व घटनेचा व्हिडीओ व्हायरल झाल्यानंतर अजित पवार यांच्यावर विरोधकांकडून टीकेची झोड होत आहे. यामुळे अखेर अजित पवार यांनी ट्विट करत आपली भूमिका मांडली आहे.

अजित पवार काय म्हणाले?

“सोलापूर जिल्ह्यातील पोलीस अधिकाऱ्यांसोबतच्या संवादाच्या संदर्भात काही व्हिडिओ समाजमाध्यमांवर प्रसारित होत आहेत. मी स्पष्टपणे सांगू इच्छितो की, माझा उद्देश कायद्याच्या अंमलबजावणीमध्ये हस्तक्षेप करण्याचा नव्हता, तर त्या ठिकाणी परिस्थिती शांत रहावी आणि ती अधिक बिघडू नये याची काळजी घेण्याचा होता”, असं अजित पवार यांनी स्पष्ट केलं.

आपल्या पोलीस दलाबद्दल तसंच धैर्यानं आणि प्रामाणिकपणे आपलं कर्तव्य बजावणाऱ्या महिला अधिकाऱ्यांबद्दल मला सर्वोच्च आदर आहे. माझ्यासाठी कायद्याचं राज्य हेच सर्वात महत्त्वाचं आहे”, असं अजित पवार म्हणाले.
(हेही वाचा : अजित पवार यांना भिडणाऱ्या महिला IPS अधिकारी अंजली कृष्णा कोण?)“मी पारदर्शक प्रशासकीय कारभारासाठी आणि बेकायदेशीर वाळू, माती, खडक उपशासह प्रत्येक बेकायदेशीर कृतीवर कायद्याप्रमाणे कठोर कारवाई करण्यासाठी कटिबद्ध आहे”, अशी देखील भूमिका अजित पवार यांनी मांडली.