दापोली तालुक्यात वीजपुरवठा खंडित; ‘दस्तुरी’ वाहिनी तुटल्याने नागरिक हैराण
दापोली : तालुक्यातील वीज पुरवठ्याचा मुख्य आधार असलेली ‘दस्तुरी’ वीज वाहिनी पोयनर-फुरस दरम्यान तुटल्याने मोठा तांत्रिक बिघाड निर्माण झाला आहे. या घटनेमुळे दापोली शहरासह परिसरातील अनेक गावे अंधारात बुडाली असून, नागरिकांना मोठ्या गैरसोयींचा सामना करावा लागत आहे.
अचानक खंडित झालेल्या वीजपुरवठ्यामुळे घरगुती कामकाज, पाणीपुरवठा तसेच व्यापारी व्यवहारांवर परिणाम झाला आहे. विशेषतः रात्रीच्या वेळी अंधाराचे साम्राज्य पसरल्याने नागरिकांमध्ये भीतीचे वातावरण निर्माण झाले असून, लहान मुले, ज्येष्ठ नागरिक आणि रुग्णांना अधिक त्रास सहन करावा लागत आहे.
महावितरणच्या पथकाकडून बिघाड दुरुस्त करण्याचे काम तातडीने हाती घेण्यात आले असून, वीजपुरवठा लवकरात लवकर पूर्ववत करण्यासाठी प्रयत्न सुरू आहेत. मात्र, वाहिनीचे नुकसान मोठे असल्याने दुरुस्तीला काही कालावधी लागू शकतो, अशी माहिती मिळत आहे.
दरम्यान, नागरिकांनी संयम राखावा तसेच आवश्यक ती काळजी घ्यावी, असे आवाहन प्रशासनाकडून करण्यात आले आहे.
मुख्य संपादक : संदीप जाधव
बहुजनांचा बुलंद आवाज – महाराष्ट्र नामा
मुख्य संपादक: संदीप जाधव
