प्रेम बिऱ्हाडे प्रकरण; पुण्यात सम्यक विद्यार्थी आंदोलनाचे मॉडर्न कॉलेजसमोर आंदोलन!
पुणे – वंचित बहुजन आघाडी प्रणित सम्यक विद्यार्थी आंदोलन, पुणे शहराच्या वतीने मॉडर्न कला, वाणिज्य आणि विज्ञान महाविद्यालयाच्या प्रशासनाकडून होत असलेल्या जातीय आणि अन्यायकारक वर्तनाविरोधात तीव्र निषेध आंदोलन करण्यात आले.
सम्यक विद्यार्थी आंदोलनाने, मॉडर्न कॉलेज प्रशासनाकडून प्रेम बिऱ्हाडे या विद्यार्थ्यावर जातीय भेदभावपूर्ण आणि अन्यायकारक वर्तन अत्यंत निंदनीय असून संबंधित प्रशासन व ट्रस्टींवर कठोर कारवाई करण्यात यावी, अशी मागणी केली आहे.
आंदोलनानंतर कॉलेज प्रशासनाने प्रेम बिऱ्हाडे यांना इमेल करून बोनफाईड पत्र दिले. मात्र, हे पत्र निव्वळ फास असून त्याचा काहीच उपयोग नसल्याची प्रतिक्रिया प्रेम बिऱ्हाडे यांनी प्रबुद्ध भारतशी बोलतांना दिली आहे.
प्रेम बिऱ्हाडे म्हणाले की, मला लंडनमधील हिथ्रो विमानतळावर जॉब लागला. हे विमानतळ जगातील अतिशय गजबजलेले विमानतळ आहे. या विमानतळाच्या सिक्युरिटी विभागात माझा जॉब होता. माझी शैक्षणिक पार्श्वभूमी तपासताना कंपनीने माझ्या कॉलेजशी संपर्क केला आणि माझ्याविषयी माहिती विचारली. याची कल्पना मला कंपनीने दिली होती. त्यामुळे मीही कॉलेजच्या संपर्कात होतो. कंपनीच्या त्या ईमेलला तातडीने उत्तर देणे आवश्यक असल्याचे मी आमच्या कॉलेजच्या वरिष्ठांच्या लक्षात आणून दिले मात्र, त्यांनी त्याला दाद दिली नाही.
माझी जात विचारण्यात आली, तेव्हा मी विरोध केला असता अजून टाळाटाळ करण्यात आली. शेवटी, वेळेत माझ्या कॉलेजने कंपनीला न कळवल्यामुळे मला ती नोकरी गमवावी लागली.
याआधी कॉलेजने मला लेटर ऑफ रिकमंडेशन दिले होते तेव्हा माझी हुशार, अत्यंत शिस्तबद्ध विद्यार्थी असल्याचे म्हटले होते. मात्र, माझ्या सोबत झालेला भेदभाव मी उघड केल्यावर कॉलेज माझ्यावर बेशिस्त असल्याचा आरोप करत आहे.
सम्यक विद्यार्थी आंदोलनाच्या आजच्या आंदोलनानंतर कॉलेजच्या प्रिन्सिपल आणि भीमा कोरेगाव हल्ल्यातील मुख्य आरोपी मिलिंद एकबोटे यांच्या पुतणी निवेदिता एकबोटे यांनी पत्र काढून असं काही घडले नसल्याचा कांगावा केलाय.
मात्र, प्रेम बिऱ्हाडे यांनी कॉलेज सोबत केलेले पत्र व्यवहार उघड केल्यावर मॉडर्न कॉलेजची नाचक्की झाली आहे.
#Prem_Birhade
#news #pune #modernCollege
मुख्य संपादक: संदीप जाधव
