दिवा शहरात नागरिकांची गॅस सिलेंडर साठी उघड लूट; मनसेचे जिल्हाधिकाऱ्यांना पत्र
दिवा शहरात घरगुती गॅस सिलेंडर वितरणामध्ये मोठा घोटाळा सुरू असल्याचे समोर आले आहे. नागरिकांनी गॅस सिलेंडर बुक केल्यानंतर त्यांना कंपनीकडून “सिलेंडर डिलिव्हर झाल्याचा” मेसेज पाठवला जात आहे. मात्र प्रत्यक्षात ८ ते १० दिवस सिलेंडर दिला जात नाही.
त्यानंतर डिलिव्हरी बॉय किंवा संबंधित गॅस एजन्सीकडून नागरिकांना पुन्हा नवीन सिलेंडर बुक करण्यास सांगितले जात आहे. हा प्रकार म्हणजे सरळसरळ नागरिकांची फसवणूक असून न दिलेले सिलेंडर काळाबाजारात विकले जात असल्याचा गंभीर संशय आहे.
सध्या देशात सुरू असलेल्या आंतरराष्ट्रीय परिस्थितीमुळे गॅसचा तुटवडा निर्माण झाल्याचे सांगितले जात असताना, दिवा शहरातील काही गॅस एजन्सी नागरिकांची उघडपणे लूट करत आहेत. अनेक कुटुंबांना ८-१० दिवस गॅस मिळत नसल्यामुळे त्यांना मोठ्या अडचणींना सामोरे जावे लागत आहे.
विशेषतः भारत गॅस कंपनीच्या काही एजन्सींबाबत या संदर्भात मोठ्या प्रमाणात तक्रारी समोर येत आहेत.
हा प्रकार अत्यंत गंभीर असून प्रशासनाने याकडे तात्काळ लक्ष देणे गरजेचे आहे. महाराष्ट्र नवनिर्माण सेना दिवा शहरातील नागरिकांच्या या प्रश्नावर ठामपणे उभी असून त्यांनी प्रशासनास खालील मागण्या केल्या आहेत.
१) संबंधित गॅस एजन्सींवर तात्काळ चौकशी करून कठोर कारवाई करण्यात यावी
२) दोषींवर फौजदारी गुन्हे दाखल करण्यात यावेत
३) गॅस वितरण प्रक्रियेत पारदर्शकता आणून नागरिकांना वेळेवर सिलेंडर उपलब्ध करून द्यावे
काळाबाजार करणाऱ्यांवर तातडीने कारवाई करून त्यांचे परवाने रद्द करण्यात यावेत याची प्रशासनाने गंभीर दखल घ्यावी.
प्रशांत प्रभाकर गावडे
सचिव – दिवा शहर
महाराष्ट्र नवनिर्माण सेना
मुख्य संपादक: संदीप जाधव
