18 वर्षीय गतिमंद तरुणीशी अश्लील चाळे, मुंबईत पोलीस उपनिरीक्षक संजय राणेला अटक, धक्कादायक व्हिडिओ समोर
आरोपी सहाय्यक पोलीस उपनिरीक्षक संजय राणे घटनेच्या वेळी दारूच्या नशेत होता का, याचीही पोलीस चौकशी करत आहेत
मुंबई : मुंबई सेंट्रल रेल्वे स्थानकाच्या जवळ गतीमंद तरुणीशी गैरवर्तन करताना सहाय्यक पोलीस उपनिरीक्षकाला अटक करण्यात आली आहे. ही घटना २२ डिसेंबर रोजी पहाटे ५ वाजण्याच्या सुमारास भाऊसाहेब हिरे पार्कमध्ये घडली. या घटनेचा व्हिडिओ सोशल मीडियावर व्हायरल झाल्यानंतर पोलिसांनी कारवाई केली.
सहाय्यक पोलीस उपनिरीक्षक संजय राणे याला गतीमंद तरुणीसोबत गैरवर्तन केल्याच्या आरोपाखाली अटक करण्यात आली आहे. पोलिसांनी व्हिडिओची सत्यता पडताळून पाहिली आणि त्याच्यावर कारवाई केली. संजय राणे हा सशस्त्र विभागात कार्यरत होता. या घटनेमुळे पोलीस दलात अंतर्गत आणि फौजदारी चौकशी सुरु करण्यात आली आहे.पोलिसांनी दिलेल्या माहितीनुसार, ही घटना मुंबई सेंट्रल रेल्वे स्थानकाजवळ असलेल्या भाऊसाहेब हिरे पार्कमध्ये घडली. त्यावेळी आरोपी पोलिसांच्या गणवेशात होता. पीडित तरुणी मानसिकदृष्ट्या अस्थिर असून आरोपी तिला पार्कमध्ये भेटला.
मॉर्निंग वॉकला येणाऱ्या नागरिकांनी हा प्रकार पाहून आरडाओरडा केला आणि आरोपीजवळ धाव घेतली. आम्ही घटनास्थळी पोहोचण्यापूर्वीच काही जणांनी त्याला शिवीगाळ आणि मारहाणही केली” असे एका अधिकाऱ्याने सांगितले
आरोपी सहाय्यक पोलीस उपनिरीक्षक संजय राणे घटनेच्या वेळी दारूच्या नशेत होते का, याचीही पोलीस चौकशी करत आहेत. “आरोपी घटनेच्या वेळी दारू प्यायला होता का, हे आम्ही तपासत आहोत, तसेच त्याची गुन्हेगारी पार्श्वभूमीही पडताळत आहोत” असे अधिकारी म्हणाले.
पोलिसांनी स्पष्ट केले की, आरोपीला अडवणाऱ्या नागरिकांविरुद्ध कोणतीही एफआयआर नोंदवण्यात आलेली नाही. “आतापर्यंत आम्ही जमावाविरुद्ध कोणतीही एफआयआर नोंदवलेली नाही. दोन व्हिडिओ व्हायरल झाले आहेत. आम्ही लोकांना विनंती करतो की अफवा पसरवू नये, कारण आरोपीला अटक करण्यात आली आहे” असे अधिकाऱ्याने सांगितले.
सहाय्यक उपनिरीक्षकाच्या विरुद्ध छेडछाडीचा गुन्हा दाखल करण्यात आला आहे. ताडदेव पोलीस या प्रकरणाचा तपास करत आहेत. पीडित तरुणीच्या मानसिक स्थितीचा गैरफायदा घेण्याचा प्रयत्न झाल्याचा आरोप असल्याने हे प्रकरण अधिक संवेदनशील बनले आहे. पोलिसांनी पीडितेच्या कुटुंबीयांशी संपर्क साधला आहे का आणि त्यांना काय मदत केली जात आहे, याबद्दलही माहिती मिळवण्याचा प्रयत्न केला जात आहे
पोलिसांनी नागरिकांना संयम राखण्याचे आणि तपासात सहकार्य करण्याचे आवाहन केले आहे. सोशल मीडियावर व्हायरल होणाऱ्या व्हिडिओ आणि माहितीची सत्यता पडताळून पाहण्याची गरज आहे. या प्रकरणाचा तपास पूर्ण झाल्यानंतर दोषींवर कठोर कारवाई केली जाईल, अशी अपेक्षा व्यक्त केली जात आहे.
मुख्य संपादक: संदीप जाधव
