Navi Mumbai Slab Collapse : कोपरखैरणेमध्ये खासगी शिकवणीवर पहिल्या मजल्याचा स्लॅब कोसळला, एका विद्यार्थ्याचा मृत्यू, अनेक जण जखमी
नवी मुंबईच्या कोपरखैरणे येथे एका घरगुती शिकवणी वर्गात अचानक पहिल्या मजल्यावरचा स्लॅब कोसळला. यामुळे मोठी दुर्घटना घडली. या घटनेत एका 14 वर्षीय विद्यार्थ्याचा मृत्यू झाला आहे.
नवी मुंबई : कोपरखैरणे येथे एका सोसायटीतील घरात सुरु असलेल्या खासगी शिकवणीत अचानक स्लॅब कोसळल्याची घटना घडली. विशेष म्हणजे घरगुती शिकवणी सुरु असतानाच स्लॅब कोसळल्याची घटना घडली. त्यामुळे 12 विद्यार्थी आणि 1 शिक्षिका स्लॅबच्या ढिगाऱ्याखाली अडकले होते. इमारतीच्या पहिल्या मजल्यावरचा स्लॅब थेट खाली कोसळल्याने ही दुर्दैवी घटना घडली. या घटनेत एका 14 वर्षीय विद्यार्थ्याचा मृत्यू झाल्याची दुर्दैवी घटना समोर आली आहे. घटनेनंतर अग्निशामक दलाचे जवान घटनास्थळी दाखल झाले होते. अग्निशामक दलाच्या जवानांनी एका शिक्षिकेसह 13 जणांना ढिगाऱ्याखालून सुखरूप काढल्याची माहिती आहे. संबंधित घटना ही कोपरखैरणे सेक्टर 2 येथील प्लॉट क्रमांक 12 वरील विद्या भवन सोसायटी येथे घडली. विद्या भवन सोसायटीच्या तळमजल्यावर घरगुती शिकवणी वर्ग सुरु होता. पण संध्याकाळी सव्वा पाच वाजेच्या सुमारास अचानक पहिल्या मजल्यावरील स्लॅबचा काही भाग हा थेट तळमजल्यावर असणाऱ्या शिकवणी वर्गावर पडला. त्यामुळे मोठी खळबळ उडाली. घटना घडली तेव्हा मोठा आवाज आला. त्यामुळे आजूबाजूचे नागरीक घटनास्थळी आले. यानंतर तातडीने बचावकार्याला सुरुवात झाली.
अग्निशामक दलाच्या जवानांकडून बचावकार्य
स्थानिक नागरिकांनी पोलीस आणि अग्निशामक दलाला याबाबत माहिती दिली. घटनेची माहिती मिळताच अग्निशामक दलाचे जवान घटनास्थळी दाखल झाले. अग्निशामक दलाच्या जवानांकडून तातडीने बचावकार्याला सुरुवात झाली. मलब्याखाली सर्व विद्यार्थी आणि शिक्षक दाबले गेले होते. जवानांनी त्यांचा शोध घेतला आणि त्यांना सुखरुप बाहेर काढले.जवानांकडून काही वेळ हे बचावकार्य चालले. या बचावकार्यात 12 विद्यार्थी आणि एका शिक्षिकेला सुरक्षितपणे ढिगाऱ्याखालून काढण्यात आले. या घटनेत अनेक विद्यार्थी जखमी देखील झाले आहेत. सर्व जखमी विद्यार्थ्यांना तातडीने उपचारासाठी रुग्णालयात दाखल करण्यात आले. पण एका विद्यार्थ्याचा दुर्दैवाने उपचारादरम्यान मृत्यू झाला. मनीष म्हसे असं मृतक विद्यार्थ्याचं नाव आहे. मनीष हा अवघ्या 14 वर्षांचा होता. त्याच्या मृत्यूनंतर परिसरात हळहळ व्यक्त होत आहे.
संबंधित घटना जिथे घडली ती इमारत ही 1988 साली बांधण्यात आल्याची माहिती समोर येत आहे. या सोसायटीत एकूण 16 कुटुंब वास्तव्यात आहेत. घटनेनंतर सर्व कुटुंबांना सुरक्षितस्थळी हलवण्यात आल्याची माहिती आहे.
मुख्य संपादक: संदीप जाधव
